Teri Yaad

Main rahoon ya na rahoon is jahan mein,
Teri hasi ki baarish meherban rahegi,
Main gum bhi ho jaun pyaar ke karwan mein,
Teri yaadon ki lehren, mujhe saath le kar bahegi.

Tune maanga tha ek din mujhse pyaar ka hisaab,
Lagta hai ab wo udhari mere saath hi chalegi,
Bohot khali jagah thi mere aashiyane mein,
Nahi pata tha yahan dard aur khamoshi palegi.

Hawa ban kar udata tha tere baalon ko,
Chup ke se aa ke chum leta tha tere gaalon ko,
Par ab hawa paani sab dushman hain mere,
Main to yahin hun, par wo roz ja kar chu lete hain chehre ko tere.

Teri yaadon ki chadar mein lipta hun main,
Teri zulfon ke saaye mein kahin to zinda hun main,
Jee uthega yeh dil jab tera deedar hoga,
Warna aaj kal maut se bhi sharminda hun main.

Teri Duniya

Is dil mein jo hai chupa main kisi se na kehta,
Agar mere har kadam mein tu aks ban ke rehta,
Maine har safa bhul ke tujhe chaha tha,
Kaash tu bhi pyaar ke dariya mein saahil ban ke behta.

Maine is duniya se door banai hai ek duniya,
Jahan aaj bhi tera hi raaj chalta hai,
Jahan teri muskurahat se loha pighalta hai,
Jahan tere aane ki aahat se hawa ka rukh badalta hai,
Jahan sooraj tere kehne pe ugta hai aur tere ishare pe hi dhalta hai.

Jahan tere liye duniya ke har phool ki mahak hai,
Jahan bijli ka girna bhi tere krodh ki dahak hai,
Jahan ka kanoon tere dil ki aawaaz hai,
Jahan teri khushiyan hi us duniya ka aagaz hai.

Par aaj wo duniya kuch viraan si lagti hai,
Usmein rehne wale ki aankhen din raat chalakti hai,
Use intezar hai apni rani ka,
Jo likh de sunehra ant, is jadui kahani ka.

Teri Hawa

Yeh behti hawa tera aanchal yaad dilati hai,
Na sard na garm, jahan bas teri fiza lehrati hai,
Teri ruhani khushboo mera poora bagh mehkati hai,
Main bhool jaata hun apne aap ko,
Har jagah bas teri hi riyasat nazar aati hai.

Yahan sukha bhi hai aur hariyali bhi,
Jaise tu hai bhi aur nahi bhi,
Tere hone se yeh mausam aur gulzar ho jaata,
Lekin agar tu na hoti to yeh sab bhi banjar aur bekaar ho jaata.

Koi shant hawa jab pedon ko chuti hai,
Kuch khushnuma sa unke kaano mein kehti hai,
Lehra uthte hain wo us awaaz se,
Khush ho jaate hain us ehsaas se,
Mujhe bhi bas usi awaaz aur ehsaas ki tamanna hai,
Sama le jo mujhko khud mein,
Tere aise jeevan ka ansh mujhe banna hai.

Tere Naina

Teri khubsurat aankhon mein ek haseen jahaan dekhta hun,
Humare pyaar ke rangon mein saji ek ankahi dastaan dekhta hun,
Badhti jaye ye dastaan, haseen hota jaye ye jahaan,
Yahi prarthna liye, har roz tujh mein bhagwan dekhta hun.

Teri aankhen ugal deti hain saare raaz mujhe,
Dikha deti hain saare lamhe, saare shikve, sab gile,
Kabhi wahan gehre sannate bhi rehte hain,
Jab ashk baarish ki boondon se bhi zyada behte hain,
Bas yahi ek shikayat hai mujhe teri aakhon se,
Kyu ye bina roye sab nahi kehte hain.

Jab fel jaata hai teri aankh ka kajal,
Karha uthta hai dard se mera har pal,
Bas yahi teri ek aadat mujhe pasand nahi,
Baaki meri jaan bhi le le, mujhe koi gham nahi.

Teri aankhen bas khushi se muskurati rahe,
Pyaar ke geet hamesha yun hi gaati rahe,
Gum ho jaun sada ke liye inki gehrai mein,
Kabhi nazar bhi aaun to sirf teri parchai mein.

Teri Hasi

Jab bhi tere hothon pe muskurahat aati hai,

Meri rooh ek ajab sa sukoon paati hai,

Saans bhar leta hai samay bhi tujhe nihaarne mein,

Waqt ko waqt lag jaata hai khud ko ubhaarne mein.

Mere maathe ki saari lakeerein mit jaati hain,

Zindagi ki saari uljhi dorein kat jaati hain,

Tu jo muskura de ek baar dil khol ke,

Shrasti bhi tere aadhipatya ke liye lad jaati hai.

Teri hasi mein ek sunahri si shaam dekhta hun main,

Tere saamne is duniya ko aam hote dekhta hun main,

Anmol hai teri hasi ki wo goonj,

Baaki har ek aawaz ko sareaam hote dekhta hun main.

Tere gaal jab bade ho jaate hain muskurane se,

Tab chand bhi sharma jaata hai tere saamne aane se,

Kaun puchega phir uski khubsurti ko,

Agar wo tere saamne aa gaya apni kismat aazmane ko.

Teri muskurahat ki ibadat kar ke jee rahe hain hum,

Uska deedar kar ke bhool jaate hain saare shikve, saare ghum,

Agar maut bhi aa gayi kal to usko dikha denge,

Kis hasi se haseen thi meri zindagi, thoda usko bhi jeena sikha denge.

Teri Meri Kahani

Mere haath mein jab bhi tera haath raha,
Khuda ke daman se mere vaaste noor baha,
Magar jab bhi main tujhse tanha raha,
Maine bas uski rusvai ko hi saha.

Humare kadam jab bhi saath mil kar chalte the,
Humare saaye bhi ek dusre mein dhalte the,
Lekin jab hum alag dishaon mein aage badhe,
Sirf takleefon ke pahad hi the saamne khade.

Tere aanchal mein pursukoon mein rehta tha,
Jaise shanti ke kisi dariya mein bekhauf behta tha,
Tere bina magar ab sirf becheni hi rehti hai,
Kahan le aaye tum hume, bas yahi zindagi kehti hai.

Teri nazron mein kuch jaadu to zaroor tha,
Jin mein dekh kar hume chad jaata halka suroor tha,
Aaj unhi aankhon mein khone ko hum taraste hain,
Aur tere deedar ki aas mein rozaana mere aansu baraste hain.

Teri jhulfon ki chaon mein kuch to baat thi,
Din ko bhi raat kar de, sooraj ki bhi kya aukaat thi,
Par ab to tanha raat mein bhi jal jaata hun,
Aur tere bina din mein hi dhal jaata hun.

Maine tujh par hi luta di apni poori zindgani hai,
Tujhe saamne baitha kar ab yeh gaatha sunani hai,
Main ek shehzada aur tu mere khwabon ki rani hai,
Zindagi aur kuch bhi nahi, bas teri meri kahani hai.

Tere Sang

Main jab bhi zindagi ki dhoop mein tap jaata hun,
Jab bhi saare jhoothe rishton se thak jaata hun,
Jab bhi kisi purani yaad se darr jaata hun,
Tab kyu yeh dil bas tujhe hi yaad karta hai,
Kyu yaad kara deta hai ki tujhe kitna pyaar karta hai,
Jaise tu hi manjhi hai meri nao ka,
Jaise tu hi marhum hai mere har ghao ka,
Jaise tere saath hi zindagi ki har jeet hai,
Jaise tujhse hi saare sur, poora sangeet hai.

Koi bhi mushkil jab mere saamne aayi hai,
To woh ishwar ko nahi, tujhe mere zehen mein laayi hai,
Kyuki tere pyaar mein hi maine ishwar ko paaya hai,
Aur tere saath hamesha chalta uska saaya hai.

Main har pareshani mein bhi muskura jaata hun,
Tere pyaar ke bharose nidar aage bhada jaata hun,
Teri chahat se hi maine woh shakti paayi hai,
Jo bina aankhon ke bhi mujhe aabhaas kara de,
Kahan dariya hai aur kahan khai hai.

Tere is pyaar ki badolat hi main zinda hun,
Aazaad udta jaise bekhauf parinda hun,
Tere isi pyaar ki mujhe aur darkaar hai,
Kyuki tere bina yeh zindagi berang hai, bekaar hai.