Meri Duniya

Teri saans ki aahat jo mujhe mili,

Tujhe pa ke yeh duniya meri khili,

Teri god mein sar chiphaye jo shaamein dhali,

Mere upar se duniya ki saari buri balaein tali,

Teri dabi aawaz mein suna jo ek madhur geet,

Un lafzon ko gungunate bhula di duniya ki har reet,

Tere haath par ungli se jo likhe the alfaaz,

Wo humare pyaar ki dastaan thi, jis par poori duniya ko hai naaz,

Tere aagosh mein guzri jo har shaam,

Duniya ki har khushi kar di tune mere naam,

Tere dil ki dhadkan jo suni thi pehli baar,

Ehsaas hua yeh meri hai, jab se dhadki thi duniya mein pehli baar,

Ho gaya hai tujhse pyaar, jab yeh jaana tha,

Usi din se mera mukaam, duniya mein bas tujhe paana tha.

Bheege Naina

Jo aankhen tere saath har khwab dekhti thi,

Tere saath dophar ki dhoop sekti thi,

Neend se mohlat le kar tere saath jaagti thi,

Har pal bas tera hi deedar maangti thi,

Jo naina tere saath kayi khel khelte the,

Tere chehre ka har gham jhelte the,

Jo teri khubsurti dekh kar khil uthte the,

Aur teri muskaan par dil de baithte the,

Aaj aasmaan ko taakte rehte hain wahi naina,

Khidkiyon se jhaankte rehte hain wahi naina,

Aansuon se bheeg kar ro jaate hain wahi naina,

Jalan se thak kar so jaate hain wahi naina,

Meri palkhon ka bistar the tere naina,

Aaj patharon par raat kaat te hai yeh naina,

Kal tak bas ujala hi tha meri palkhon ke aage,

Aaj raat se andhera chaant te hain yeh naina.

Kapil Sharma

Shuruat ki thi aapne ek pratiyogita jeet,
Tabhi se bana liya tha sabko apna meet,
Phir kabhi aapne peeche mud kar nahi dekha,
Laanghte chale gaye aap har jeet ki rekha,
Navjot sir ka saath aapne kabhi nahi choda,
Wahi to hain is maharana ka chetak ghoda,
Aag bhi aapke mansubon ko pighla na saki,
Kisi se mili thokar bhi aapko hila na saki,
Jab log sochne lage the ki aap kahan gaye hain kho,
Aap le kar aa gaye the Kapil Sharma show,
Na jaane kitne marizon ko aapne behtar kar diya,
Aur hasi ke shehenshah ka khitab apne naam kar liya,
Aaj is desh mein har jagah bas aapke hi charche hain,
Aapke tax se hi to chalte sarkar ke kharche hain,
Insaanon ko khushi di aapne aur jaanwaro ko pyaar diya,
Mere dil ke kai ghamo ko bhi aapne hi khushiyon se siya.

Junoon

Is lamhe mein hi chipi saari zindagi hai,

Jo aaj kara de tumhe pyaar ka ehsaas, wahi bandgi hai,

Na kal tha aur na kal hoga,

Is pal mein hi jeevan hi har khushi hai.

Aaj ek khwab apni aankhon mein basa lo,

Ek vishwas apni ragon mein bhar lo,

Kisi takraye ajnabi se chaar baatein kar lo,

Aaj ek jaanwar ko thoda sa pyaar kar lo,

Suraj se pehle uth kar keh do ki hum zinda hain,

Khilkhilate chehre se bata do ki humare gham chuninda hain,

Jhoom ke naach utho aaj apni masti mein,

Bohot hunar chupa hai teri is hasti mein,

Jo junoon hai tere dil ka, wahi is manzar ka mukam hoga,

Apni chahat ko ibadat bana le, phir tu hi shehenshah-e-aam hoga.

Humara Safar

Tera saath aur humara safar,
Hai isse khubsurat aur kuch nahi mere humsafar,
Mere dil ki sahi banawat jaanti hai tu,
Use sada se apna hi to maanti hai tu,
Kisi hakim ki tarah mere sharir ki har hulchul pehchan leti hai tu,
Aur har mushkil mein khud ko mera hakim hi maan leti hai tu,
Tere saath beeta har pal aaj bhi zinda hai,
Tere pass na reh saka, aise pal hi chuninda hai,
Mujhe har us pal ke liye afsos hai,
Dil mein bhara aaj bhi apne liye rosh hai,
Par tune baaki saare palon ko apni aamadgi se jeevant kar diya,
Mujhe aur humare pyaar ko sada ke liye anant kar diya,
Tere pyaar mein bhool gaya sab,
Aur kisi cheez ka hosh hi nahi,
Par haan mujhe yaad hai wo sab,
Jo kabhi hua hi nahi.

Shiksha

Jab bhi in aankhon mein khushi ka aansu aata hai,

Jab bhi yeh dil koi mukam paata hai,

Jab bhi mera sar dard pakad jaata hai,

Jab bhi koi gham dil ko yaad aa jaata hai,

Jab koi safalta mujhe gale lagati hai,

Jab kisi itr ki khusboo mujhe bohot bhaati hai,

Jab prakriti mujhe apne khubsurat rang dikhati hai,

Jab koi nukili cheez mere sharir par ghao kar jaati hai,

Jab der raat neend mujhe satati hai,

Jab thandi hawaein is sharir ko kapati hai,

Har us pal mujhe bas teri hi yaad aati hai,

Khushi ho ya gham, yeh dhadkan tujhe hi bulati hai,

Tujhe ishwar ne mere liye vardaan banaya hai,

Kyuki mere jeevan mein jab bhi aisa koi mod aaya hai,

Maine har us mod par tujhe apne saath khada paaya hai.

Behti Nadi

Kisi vishal parvat se hota hai uska srijan,

Chali hai apni lambi yatra shuru karne, bhigoke apna tan,

Jeevan hai uska srishti ki pyaas bhujana,

Par uski jeevan leela ko hai kitno ne jaana.

Peda hote hi uska sangarsh shuru ho jaata hai,

Path ka har patthar jaise use yudh ke liye lalkarta hai,

Un par vijay prapt kar ke hi aage hi raah savarti hai,

Har jeet ke baad wo apni awaaz se vijay ka udghosh karti hai.

Manav jaati mein wo maa kehlati hai,

Poore jeevan har kadam uski pyaas bujhati hai,

Uske sharir aur aatma ko pavitra karati hai,

Aur ant mein apne pran tyaag kar samudra mein mil jaati hai.

Nadi ne apna har lamha jiya bas tumahre liye,

Wo ladi to bas tumhe savarne ke liye,

Wo kati to bas tumhe ubharne ke liye,

Aur hum jeete reh gaye apna matlab nikalne ke liye.